2020թ. օգոստոսի 12-ին ZOOM հարթակի միջոցով կայացավ Erasmus+ և Global UGRAD ծրագրերի վերաբերյալ վեբինար, որը կազմակերպել էր ԵՊՀ ԻՄ–ի ուսանողական խորհուրդը:

Առցանց քննարկումը վարեցին ԵՊՀ ԻՄ-ի շրջանավարտներ Ռաֆայել Հարությունյանը և Արփինե Վերանյանը, ովքեր սովորել են այս ծրագրերով Կա Ֆոսկարի (Վենետիկ, Իտալիա) և Արևմտյան Կենտուկիի (Բոուլինգ Գրին, ԱՄՆ) համալսարաններում համապատասխանաբար:

Վեբինարին մասնակցող ուսանողները ծրագրերի մասին ստացան բավականին օգտակար և հագեցած տեղեկություն: Մասնավորապես՝ սեմինարավարները ներկայացրին ծրագրերի բովանդակությանը, հստակ դրույթներով բացատրեցին դիմելու կարգը, թե դիմելիս ինչին է անհրաժեշտ ուշադրություն դարձնել, այնուհետև անդրադարձան համալսարանական և տվյալ երկրների կյանքին հարմարվելու նրբություններին:

Ռաֆայելն ու Արփինեն մեծ ոգևորությամբ ներկայացրին հետաքրքիր դրվագներ իրենց ուսանողական բովանդակալից և հագեցած առօրյայից: Նրանք ընդգծեցին, որ ծրագրերը ոչ միայն կրթական բովանդակություն ունեն, այլև ընդգրկում են մշակութային մաս. կազմակերպվում են մշակութային միջոցառումներ՝ նպատակ ունենալով ուսանողներին ծանոթացնելու այդ երկրների ազգային յուրահատկություններին:

Սեմինար-քննարկման վերջում ակտիվ և հետաքրքրված ուսանողները ստացան իրենց ուղղած հարցերի սպառիչ պատասխանները:

ԵՊՀ ԻՄ-ի ուսանողական խորհուրդը խորին շնորհակալություն է հայտնում Ռաֆայել Հարությունյանին և Արփինե Վերանյանին՝ հետաքրքիր և ուսանելի վեբինարն անցկացնելու և իրենց փորձն ուսանողներին ներկայացնելու համար:

  2020թ. օգոստոսի 3-5-ին տեղի ունեցավ ԱրՊՀ հանրային նշանակության միջոցառումների կազմակերպիչ Վահե Գալոյանի այցը ՀՀ Տավուշի մարզ:

Այցելության հիմնական նպատակն էր ուսանողության կողմից տրամադրված նվերների ու ծանրոցների փոխանցումը սահմանամերձ Այգեպար գյուղի՝ հակառակորդի հրետակոծությունից ավերված և նոր վերանորոգված մանկապարտեզի սաներին:

Հիշեցնենք, որ ուսանողական նախաձեռնությունը մեկնարկել էր հուլիսի 17-ին և կյանքի կոչվել ԱրՊՀ ուսանողական խորհրդի, ՈՒՀՏԱ և կարիերայի բաժնի ու ԵՊՀ ԻՄ-ի ուսանողների ակտիվ համագործակցությամբ:

Օգոստոսի 3-ին ԵՊՀ ԻՄ-ի ուսանողները դիմավորեցին Վ.Գալոյանին՝ նրա հետ քննարկելով այս և համատեղ այլ ծրագեր իրականացնելու հնարավորություններն ու դրանց կարևորությունը:

Օգոստոսի 4-ին ուսանողների տրամադրած նվերները Վահե Գալոյանը ԵՊՀ ԻՄ-ի ուսանողական խորհրդի աջակցությամբ փոխանցեց Այգեպար գյուղի մանկապարտեզի սաներին՝ մանուկներին ժպիտ ու բերկրանք պարգևելով:   

Նույն օրը կայացավ ԵՊՀ ԻՄ-ի տնօրենի պաշտոնակատար Ա.Մակարյանի և ուսանողների հանդիպումը ԱրՊՀ ներկայացուցչի հետ: Հանդիպման ընթացքում Վ.Գալոյանը պարոն Մակարյանին նվիրեց ԱրՊՀ ռեկտոր Ա.Սարգսյանի հեղինակած «Արցախի ժողովրդագիտությունը» աշխատության հատորները, քննարկվեցին երկու բուհերի՝ ԵՊՀ ԻՄ-ի և ԱրՊՀ-ի միջև համագործակցության խորացմանն ուղղված ծրագրերի հեռանկարները:

«Նախաձեռնությունը ևս մեկ առիթ էր ԱրՊՀ–ԵՊՀ Իջևանի մասնաճյուղ բուհերի միջև առկա համագործակցությունը խթանելու և համատեղ ծրագրեր մշակելու համար։ Համատեղ այցով լինելով Այգեպար համայնքում՝ տեղեկացրել ենք, որ ուսանողների կողմից բարի կամքի դրսևորմամբ նպատակ ենք հետապնդել ժպիտներ պարգևել անմեղ երեխաներին և հավաստիացնել, որ ցանկացած պարագայում նրանց կողքին ենք և թև ու թիկունք ենք» – ընդգծեց Վահե Գալոյանը:

ԵՊՀ Իջևանի մասնաճյուղը և Ուսանողական խորհուրդը ողջունում ու կարևորում են ուսանողական այս նախաձեռնության իրականացումը, որը հնարավորություն տվեց համավարակային կանոնների պահպանմամբ ուրախություն պարգևել փոքրիկներին:

  ԵՊՀ Իջևանի մասնաճյուղի սիրելի՛ շրջանավարտներ, շատ կցանկանայի, որ ձեր կյանքում կատարվող այս նշանակալից տոնական իրադարձությունը՝ Մայր բուհի շրջանավարտի դիպլոմ ստանալու արարողությունը, տեղի ունենար մեր մասնաճյուղում, ձեր և  մեր՝ դասախոսական կազմիս երկուստեք ջերմ ու սրտառուչ հանդիպման պարագայում: Բայց, ցավոք, մոլորակում տարածված համավարակը, ՀՀ կառավարության կողմից հայտարարված արտակարգ դրությունը խոչընդոտեցին  այս միջոցառման հետ կապված մեր ծրագրերի իրականացումը…

Սիրելի՛ շրջանավարտներ, ջերմորեն շնորհավորում եմ ձեզ այս անմոռանալի տոնի առթիվ, բոլորիդ մաղթում բարի երթ և մեծ հաջողություններ մասնագիտական կյանքի հաջորդ բոլոր փուլերում:

Դուք, բարձր գիտելիքներ դրսևորելով, պատասխանատվության ու գիտակից հասունության քննություններ հանձնեցիք, ավարտական  հիանալի աշխատանքներ  պաշտպանեցիք՝ ապացուցելով մեծ կյանք մտնելու համար ձեր պատրաստականությունը և պատրաստակամությունը՝ ձեր նպաստը բերելու մեր երկրի փայլուն ապագայի կերտմանը, ձեր ուրույն ներդրումն ունենալու հասարակական կյանքի ամենատարբեր ոլորտներում, և այսօր Մայր բուհի՝ ձեզ շնորհվող դիպլոմը հայաստանյան աշխատաշուկայում ինտեգրվելու մեծագույն երաշխիքն է:

Մեր մասնաճյուղում հնարավոր ամեն ինչ արվել է կրթության որակի բարձրացման, ձեր մասնագիտական կրթական վերջնարդյունքների լիարժեք ձևավորման համար, և  կարծում եմ, որ ուսումնառության տարիները  դա ապացուցել և արդարացրել են ձեր ակնկալիքները:

Կրթությունն է այն ամենահզոր զենքը, որով կարելի է բարեփոխել աշխարհը, և այն շարունակական պիտի լինի բարձր որակավորմամբ մասնագետ դառնալու համար: Վստահ եմ՝ դուք  ձեր ստացած գիտելիքներով կլինեք պահանջված մասնագետներ թե՛ որպես լեզվաբան, պատմաբան ու մանկավարժ, թե՛ որպես տնտեսագետ ու բնագետ, թե՛ որպես կիրառական արվեստի շնորհաշատ շրջանավարտներ՝ փառքով պսակելով նաև մեր բուհի անունը…

Սիրելի՛ շրջանավարտներ, կրկին մաղթում եմ ձեզ հաջողություններ և՛ մագիստրատուրայում, ուր սովորելու կգնաք, և՛ մասնագիտական աշխատանքների բոլոր ոլորտներում:

Թո՛ղ խաղաղ լինեն Տավուշ աշխարհի բոլոր լուսաբացներն ու մայրամուտները,  և դուք՝ որպես մարդկային լավագույն որակներով օժտված  հայրենասեր անհատներ, մեծագույն խանդավառությամբ ու ներշնչանքով աշխատանքային սխրանքներ գործեք՝ ձեր մասնագիտական գիտելիքներն ի սպաս դնելով մեր երկրի զարգացմանն ու առաջընթացին…

Բարի երթ ձեզ, ամենայն բարիք բոլորիդ, անձնական հաջողություններ ու երջանկություն…

ԵՊՀ Իջևանի մասնաճյուղի տնօրենի պաշտոնակատար,

ֆիզ.մաթ. գիտ. թեկն., դոցենտ Անուշավան Մակարյան

  2020թ. հուլիսի 15-ին ԵՊՀ Իջևանի մասնաճյուղում կայացավ Ուսանողական խորհրդի նախագահի ընտրություն:

Ընտրությունից առաջ մասնակիցներին և թեկնածուին ողջունեց ու հաջողություն մաղթեց ԵՊՀ ԻՄ-ի ուսանողական խորհրդի նախագահ Արեն Ավետիսյանը:

Ձայնի իրավունքով ընտրությանը մասնակցում էին Ուսանողական խորհրդի նախագահության 11 անդամները:

11 հոգուց բաղկացած ընտրական հանձնաժողովի կազմում ընդգրկված էին տնօրենության 2 անդամ՝ Հայոց պատմության և հասարակագիտության ամբիոնի ասիստենտ Ա․Ազատյանը, մասնաճյուղի գրադարանի վարիչ Վ․Պողոսյանը, ԵՊՀ ԻՄ-ի արհբյուրոյի նախագահ Ա.Մարգարյանը, Ուսանողական խորհրդի 6 անդամներ (առկա և հեռակա ուսուցման համակարգերի) և Ուսանողական գիտական ընկերության 2 ներկայացուցիչ: Հանձնաժողովի նախագահն էր Վ․Պողոսյանը:

Առաջադրվել էր 1 թեկնածու՝ «Ֆինանսներ (ըստ ոլորտի)» մասնագիտության երրորդ կուրսի ուսանողուհի Լուիզա Մադաթյանը։

Նա ընտրության մասնակիցներին ներկայացրեց իր նախընտրական ծրագիրը:

Ձայների պարզ մեծամասնությամբ Լուիզա Մադաթյանն ընտրվեց ԵՊՀ Իջևանի մասնաճյուղի ուսանողական խորհրդի նախագահ:

ԵՊՀ ԻՄ-ի ամբողջ անձնակազմի և ուսանողության անունից սիրով շնորհավորում ենք ՈՒԽ-ի նորընտիր նախագահին՝ մաղթելով նրան հետաքրքիր ծրագրերով ու նախաձեռնություններով լի, բուռն և արդյունավետ գործունեություն:

  ԵՊՀ-ի ռեկտորի պաշտոնակատար Գ.Գևորգյանի հրամանով առկա ուսուցմամբ և ուսման վարձավճարի լրիվ փոխհատուցմամբ (անվճար համակարգ) ԵՊՀ-ի մագիստրատուրա է ընդունվել ԵՊՀ ԻՄ-ի 2020թ. 11 շրջանավարտ, նույն համակարգով (անվճար) ԵՊՀ-ի ասպիրանտուրա է ընդունվել մասնաճյուղի 2018թ. 4 շրջանավարտ:

2020-2021 ուստարում ԵՊՀ-ի ասպիրանտուրա են ընդունվել ԵՊՀ ԻՄ-ի շրջանավարտներ՝

1. Ալբերտ Մարատի Զուրաբյանը /ԺԹ.00.01 – Ընդհանուր հոգեբանություն, հոգեբանության տեսություն և պատմություն, անձի հոգեբանություն/,
2. Ռաֆայել Գառնիկի Հարությունյանը /Ժ.02.07 – Ռոմանագերմանական լեզուներ (անգլերեն)/,
3. Հայկ Արթուրի Դանիելյանը /Ժ.02.07 – Ռոմանագերմանական լեզուներ (անգլերեն)/,
4. Էդգար Գևորգի Վարշամյանը /Է. 00.01 – Պատմություն, հայոց պատմություն/:

ԵՊՀ-ի եվրոպական լեզուների և հաղորդակցության ֆակուլտետի մագիստրատուրա են ընդունվել ԵՊՀ ԻՄ-ի շրջանավարտներ՝

1. Մանե Գագիկի Գաբրիելյանը,
2. Մարիամ Արմենի Բաբուռյանը:

Ինֆորմատիկայի և կիրառական մաթեմատիկայի ֆակուլտետի մագիստրատուրա են ընդունվել՝

1. Գերասիմ Սամվելի Ալավերդյանը,
2. Արգիշտի Ալեքսանի Մարգարյանը:

Հայ բանասիրության ֆակուլտետի մագիստրատուրա է ընդունվել Աստղիկ Արթուրի Ղազարյանը:

Մանկավարժության և կրթության զարգացման կենտրոնի մագիստրատուրա են ընդունվել՝

1. Աշխեն Ալբերտի Վիրաբյանը,
2. Մարինե Մարտունի Մարտիրոսյանը,
3. Վանուհի Սուրենի Հարությունյանը:

Տնտեսագիտության և կառավարման ֆակուլտետի մագիստրատուրա են ընդունվել՝

1. Աննա Անդրանիկի Չիբուխչյանը,
2. Տիգրանուհի Վարուժանի Թիրաբյանը,
3. Հրանտ Սանդրիկի Ղարագյոզյանը:

ԵՊՀ ԻՄ-ի ամբողջ անձնակազմի անունից ջերմորեն շնորհավորում ենք մեր սիրելի շրջանավարտներին՝ անվճար հիմունքով ԵՊՀ-ի մագիստրատուրա և ասպիրանտուրա ընդունվելու կապակցությամբ, մաղթում ենք նրանց շարունակական հաջողություններ, ամենայն բարին, մեծ կամք և նպատակասլացություն՝ իրենց ողջ ներուժը, գիտելիքներն ու կարողությունները կրթության և գիտության ոլորտում նպատակային և արդյունավետ ծառայեցնելու գործում: