ԵՊՀ ԻՄ-ում գործող «Ամերիկյան գրադարան և դասընթացների կենտրոն»-ում 2021թ. դեկտեմբերի 3-ին և 4-ին անվճար հիմունքներով կազմակերպվում է Իջևան համայնքի բարելավման ռազմավարական զարգացման գործնական դասընթաց:

Այն կվարեն «Կասկադ Փիփլ և Բիզնես» ընկերության հիմնադիր և տնօրեն, Հայաստանի մարդկային ռեսուրսների ասոցիացիայի նախագահ, ս.գ.թ. Արփի Կարապետյանը և Հայաստանի ամերիկյան համալսարանի բիզնես ռազմավարության դասախոս, տ.գ.թ. Սերգեյ Թանթուշյանը:

Դասընթացի նպատակն է մասնակիցներին փոխանցել բազային գիտելիքներ և գործնական հմտություններ ռազմավարական պլանավորման և իրականացման վերաբերյալ, տրամադրել գործիքակազմ ռազմավարական ծրագրերի գեներացման, նախագծման և իրականացման վերաբերյալ:

Դասընթացի ավարտին մասնակիցները՝

• կստանան բազային գիտելիքներ ռազմավարական պլանավորման վերաբերյալ,
• կկարողանան արդյունավետ իրականացնել նախագծերի ընտրությունը և զարգացումը,
• կստանան շոշափելի արդյունք նախագծի վիզուալիզացիայի վերաբերյալ,
• կկարողանան սահմանել այն չափանիշները, որոնցով պետք է իրականացվի ռազմավարական պլանավորում և նախագծերի իրականացում:

Դասընթացը կտևի 2 օր, ընդհանուր10 ժամ:

Դասընթացին մասնակցելու համար կարող են դիմել
18 և բարձր տարիքի անձինք, ովքեր բնակվում են Իջևանում և Իջևանին մոտ համայնքներում:

Մասնակցելու համար անհրաժեշտ է լրացնել հայտադիմումը:

Գրանցման վերջնաժամկետն է 2021թ. նոյեմբերի 28-ը՝ ժամը 24:00-ն:

Դասընթացի վերջում հավաստագիր կստանան միայն ամբողջական մասնակցություն ցուցաբերած մասնակիցները: Դասընթացի ավարտին ներկայացված նախագծերից լավագույնը կստանա մրցանակ:

 Սիրելի՛ ուսանողներ, ԵՊՀ Իջևանի մասնաճյուղի տնօրենության և ողջ անձնակազմի անունից ջերմորեն շնորհավորում ենք ձեզ Ուսանողության միջազգային օրվա առթիվ՝ քաջ գիտակցելով, որ դու՛ք՝  երիտասարդներդ եք իսկապես հասարակության շարժիչ ուժն ու մեր երկրի ապագան կերտողը:

Մաղթում ենք ձեզ նշանակալի ձեռքբերումներ ու հաջողություններ ուսման մեջ և ձեր բոլոր նախաձեռնություններում, անկոտրում ոգի և նպատակասլացություն՝ ձեր գիտելիքներն ու կարողությունները մեր երկրի զորացմանն ու առաջընթացին լիարժեք ծառայեցնելու գործում:  

Տոնի նախապատմությունը

1939թ. նոյեմբերի 17-ին ֆաշիստները շրջափակեցին Պրահայի համալսարանի ուսանողական հանրակացարանը և շուրջ 1200 ուսանողների գերեվարեցին համակենտրոնացման ճամբար։ Այդ նույն օրը, ըստ տեղեկությունների, ինն ուսանող մահապատժի ենթարկվեց։ Պրահայի համալսարանը փակվեց, և շենքն օգտագործվեց Գերմանիայի զավթիչ ուժերի կողմից։ Հիտլերի հրամանով Չեխոսլովակիայի բոլոր բուհերը փակվեցին մինչև պատերազմի ավարտը։ Այդ բռնություններին ուսանողները փորձեցին հակազդել։ Նույն օրը Պրահայի փողոցներում կազմակերպված ցույցով հակաֆաշիստական ուսանողական կոալիցիա ձևավորվեց։ Երկու տարի անց՝ 1941 թվականին, եվրոպական տարբեր երկրների ուսանողներ Լոնդոնի ուսանողական միջազգային խորհրդում որոշեցին նոյեմբերի 17-ը նշել որպես Ուսանողության միջազգային օր՝ հիմքում ունենալով ֆաշիզմի դեմ պայքարը:

 Հետագայում՝ 1980-ական թվականների երկրորդ կեսին, Պրահայի ուսանողները սկսեցին այդ օրը նշել որպես անկախության օր։ 1989թ. նոյեմբերի 17-ի հանրահավաքով էլ սկիզբ դրվեց Չեխոսլովակիայում իրականացված ոչ բռնի հեղափոխության:

Այսօր նոյեմբերի 17-ը համարվում է ուսանողների խորհրդանշական համախմբման օր, որը տոնում են աշխարհի շատ երկրներում, այդ թվում՝ Հայաստանում:

 Հարգելի՛ համալսարանականներ, 2021թ. նոյեմբերի 22-24-ին՝ ժամը 17:00-19:00-ին (Երևանի ժամանակով), Էրազմուս+ տեխնիկական աջակցության առաքելությունների (TAM) շրջանակներում կիրականացվի «Ուսանողակենտրոն ուսուցում և դասավանդում (SCLT). SCLT-ի կիրառումը դասախոսների կարողությունները զարգացնելու և ուսուցման պլանավորումը բարելավելու համար» ինտերակտիվ առցանց սեմինարը, որը կվարի դոկտոր Մանյա Կլեմենչիչը:

Սեմինարի լեզուն անգլերենն է՝ հայերեն համաժամանակյա թարգմանությամբ։

Այն նախատեսված է համալսարանի պրոֆեսորադասախոսական կազմի համար և նպատակ ունի բարելավելու նրանց գիտելիքներն ու կարողությունները ուսանողակենտրոն դասընթացներ մշակելու և ակտիվ ուսուցման մանկավարժական տարրեր ներառելու իրենց դասընթացների ձևավորման և մատուցման մեջ:

Սեմինարի ընթացքում տրված գործիքներից և մեթոդական ուղեցույցներից մասնակիցները կարող են՝

• բացահայտել ուսանողակենտրոն ուսուցման և դասավանդման հիմնական սկզբունքները, որոնք համապատասխանում են բարձրագույն կրթության համատեքստին,
• պրակտիկա ձեռք բերել՝ մշակելով SCLT-ի վրա հիմնված դասընթացներ/սեսիաներ, որոնք ներառում են SCLT տարրեր և ակտիվ ուսուցման գործողություններ և տեխնիկա:

Սեմինարին մասնակցելու համար անհրաժեշտ է մինչև 2021թ. նոյեմբերի 18-ը գրանցվել՝ անցնելով հետևյալ հղումով։ 

Հարցերի դեպքում կարող եք կապվել Էրազմուս+ բարձրագույն կրթության բարեփոխումների փորձագետների թիմի անդամ տիկին Աննա Գևորգյանի հետ՝ գրելով gevorgyan.anna.k@gmail.com  էլեկտրոնային հասցեին:

Սեմինարի օրակարգը և Zoom–ի հղումները հասանելի են այստեղ:

Հարգելի՛ համալսարանականներ, Ռուսաստանի Դաշնության կրթության նախարարության աջակցությամբ 2021թ. նոյեմբերի 20-21-ը ՀՀ-ում՝ Հայ-ռուսական (սլավոնական) համալսարանում, տեղի կունենա «Ռուսաց լեզուն որպես մասնագիտական շարժունակության գործիք. ավանդույթներ և նորարարություններ» միջազգային համաժողովը խորհրդային և ռուսական բուհերի շրջանավարտների համար:

Համաժողովի շրջանակներում կիրականացվի «Լեզուն և ժամանակը. մասնագիտական զարգացման ուղիները» միջոցառումը:

Միջազգային ֆորումի միջոցառումների ծրագիրը հետևյալն է.

• Կլոր սեղան «Դադարեցնել գիրք կարդալը նշանակում է դադարել մտածել» (Ֆ.Դոստոևսկու ծննդյան 200-ամյակին և Մ.Գորկու մահվան 85-ամյակին):
• «Աշխարհի ռուսալեզու պատկերի հիմնաբառերը» գիտաժողով:
• Դասախոսություն «Մի՛ լքիր քո մոլորակը» (Վ. Ի. Դալի ծննդյան 220-ամյակին) – «Ժողովրդական իմաստության հանրագիտարան»:
• Վարպետության դաս «Սովորում ենք լսել կրեոլիզացված տեքստերի հիման վրա»:

Միջոցառումների անցկացման վայրը Հայաստանի Հանրապետությունն է, ք. Երևան, Հովսեփ Էմինի փող., 123, Հայ-ռուսական (սլավոնական) համալսարան:

Միջոցառումներին մասնակցելու համար անհրաժեշտ է գրանցվել հետևյալ հղումով՝ https://docs.google.com/…/1FAIpQLScrNdP…/viewform:

Բոլոր մասնակիցները կստանան հավաստագրեր:

Համաժողովի վերաբերյալ ամբողջական տեղեկատվությանը կարելի է ծանոթանալ հետևյալ կայքում՝ http://ino-tula.ru/rus-forum/:

 Հարգելի՛ համալսարանականներ, 2021թ. նոյեմբերի 16-ից ԵՊՀ ԻՄ-ի բակալավրի առկա և հեռակա ուսուցման ուսումնական գործընթացը կիրականացվի առկա եղանակով՝ հակահամաճարակային բոլոր կանոնների պահպանմամբ։

Դասացուցակները կարող եք տեսնել ԵՊՀ ԻՄ-ի պաշտոնական կայքէջում՝ http://old-ijevan.ysu.am/։